b 5:Jn 13.34; 15.12, 17

John di bura remanu

Ago di ini adina

John di bura remanu bi “dubu di ourefeidena amiye” iniye “ini mokei vava redo rema ini mida sa” rofu bura reyo. Mina bi mirona rautu di dubu ini ekalesia vene sa. Fefa ini sina bi egira ago amiye be uka mana rofu ma ofaofa nidedi vene ini oteimadedi rofu vei feidegasa ameibiyaganedi.

Beika sina ideriAgo di ini adina1–3Uka mana bi vava iniye4–6Ofaofa oteimana vei feide mona reyagane7–11Metona ago12–13

2 John

1 Mina bura bi dubu di ourefeidena amiye rofu.

Bodo mokei vava reida rema, ini mida sa, ^{▼▼v.1 rema ini mida sa:Mina bi dubu ini vene sa (ka nanaka 4–5ri).} kaere bi rama iniye nai uka maida. Na maka de idu, amiye tauvakoi, kaere bi mina sina rama ina diba ka ini uka ya madedi, 2 adina mina sina rama bi una sa amedo, ye una sa ameibigo ari neinei.

3 Baba Sei ma Iesu Keriso ini Mida di buni toragade, iriyeduka ma uka amuta una sa sina rama ma uka mana dudu ameibiyaine.

Sina rama ma uka mana

4 Na bi neidesi ada toragade reyaka adina sina rama dudu yi mida be bi Baba yaku ini ago gira una maro kana dudu amededi. 5 Maka ye, ya mokei vava reida rema, ago gira ruaka yokoi de bura reida idu, mina sina ya bi sena moiyafa ini adinari gutu. Nai usausa uni fogori bi uniyeuniye uka manadi. ^b 6 Uka mana di ago bi yomakai: Sei di ini ago gira yaku niyo kana ini vegu rega ameibinadi. Adinari gutu neideyadi kana, ini ago gira bi uka mana vegu dudu ameibigedi.

7 Ofaofa vene taugade bi kono tora noibanu ma sena oku rofu rei diyadi. Mina vene yaku nidedi Iesu Keriso bi amiye rovaita kana nisi soka reyo vo de nidedi. Mina kana amiye bi ofaofa vene ma Keriso di tuma vene. 8 Mina resi vei feidegasa dibo refa, de bi yi ^{▼▼v.8yi;bura bedakai biuni.} beika mofa resi moiyadi bi eyaregedi baebu. Yi obini bi tora noibanu gabi mironi moigedi.

9 Kaere amiye Keriso di beika oteimaro moi gira de rigo, idu fafa ma bogo bi Sei ina sa de. Kaere amiye Keriso di ini beika oteimaro mina moi gira rigo bi Baba ma ini Mida bi ina sa. 10 Kaere amiye ya rofu baisi mina oteimana de moi baigo bi yi yavari moi na ga re, resi, “Uka amuta bi ya sa” ka ga ni. 11 Adina kaere amiye yaku mina amiye rofu buni ago nigo vo nisi bi ina remanu mina amiye di no mina auna regedi.

Metona ago

12 Na bi ago toragade ya nigida idu, bura bi de regida, makai rena kana nai mokenari bi, na kaya bae negida rofu ya vesi mamo ya nigida, ye una tauvakoi ada regifa.

13 Yi mokei vava reisa rasini di midamida ^{▼▼v.13 yi mokei vava reisa rasini di midamida:Mina bi bura rena amiye di dubu di ekalesia vene.} yaku ini kokora ni feidededi ya rofu.